दि. ०१ ऑक्टोबर २००९ च्या दैनिक सकाळ स्मार्त सोबती पुरवणीत अशोक कुमार
शर्मा यांच वांग्मय चौर्य “गान लता” हि कविता वाचनात आली.
दि. ७ जानेवारी २००३ रोजी माझी कविता “स्वरलता”  दैनिक सकाळ मध्ये
प्रसिद्ध  झाली होती. काही शब्दात बदल करून ती कविता  जशास तशी स्वतःच्या
नावावर कवी महाशयांनी खपवली.

आयुष्यावर बोलू काही म्हणून,
आयुष्यावर बोलता येत नाही…
सुख दुःखांचा ताळेबंद पुरेसा,
शब्दात तोलता येत नाही…
रोज नव्या अनुभवाने सजते,
आयुष्याची नवी कोरी वही…
प्रत्येक वळणावर शिकवत जाते,
रोजच अतर्क्य आयुष्य काही…
आयुष्य म्हणजे जन्म मृत्यूला,
सांधणारी एक अनमोल रेषा..
पण सरळ समांतर अशी सहज,
आयुष्याला मिळत नाही दिशा…
आयुष्य म्हणजे अव्याहत संघर्ष,
तरी त्यातून शोधावी लागते वाट…
‘तम’ झुगारून येते तेंव्हाच मग,
रम्य सोनेरी हसरी पहाट…
आयुष्यावर आपल्या इतरांनी बोलावं,
असंच करून ‘जावं’ काही,
सार्थतेच्या कृतार्थ कसोटी वर…
तेंव्हा कदाचित, आयुष्यावर बोलू काही…